طول الوقت كنت
بحارب هذا الشخص .. هذا الشخص الموجود جوايا .. يطلع وقت ما يحب يتصرف بمنتهى الاندفاع
والحدية والتهور ويعك الدنيا ويختفي تاني ..
ازاي احب نفسي أنا وظلي
كنت حاسة إن من غيره حياتي هتبقى احسن .. اهدأ .. كنت مستنية اليوم اللي هاتخلص منه عشان الناس تحبني بقى وتقبلني .. وماكنش بيمشي ابداً وافضل بعد ظهوره حاسة بالندم والعجز ومستنية كل الناس تغفرلي .. كبرت والحياة اديتني ضهرها وفضلت تديني فوق راسي بسببه طبعاً ..
مين يستحمل ده مين يستحمل كده .. الخوف والتوتر اكلوني وظهرت شخصية تانية مزعجة خايفة علطول ، متوترة علطول بتفكر علطول مش بعرف انام منها ومش بتبطل تنهش فيا .. فوق كل ده كنت حاسة بتناقض ازاي مندفعة كده وازاي متوترة كده .. ازاي واثقة ومش واثقة .. ايه بيحركك وايه بيوقفك .. نفسي تختفوا انتوا الاتنين وتبطلوا تاكلوا في قلبي واعصابي ودماغي .. لو بس بعدتوا عني هعيش مرتاحة .. الناس كلها بتقول اني انسانة قوية وبعرف اتصرف ، جريئة ومش انهزامية بتحدى اي صعوبة وبكسر كل باب وبعرف اخرج من السجن مهما طالت حبستي فيه مش بفتح الباب وبخرج لا بكسر الباب واطلع وماببصش ورايا ..
ازاي احب نفسي أنا وظلي
غريبة .. انا عيشت سنين محبوسة ورا الباب ده مع اني كان ممكن افتحه عادي واخرج .. الاكرة كانت موجودة وماكنش مقفول بالمفتاح .. يعني افضل حبيسة وخايفة اخرج ويوم ما اخرج اكسر الباب كده واضربه بالشلوت؟ بصراحة هو كان يستاهل .. كان يستاهل يتكسر ستين حتة كمان .. لو كنت خرجت من زمان وبهدوء كان هيبقى اسهل بس انا ماعرفتش اعمل كده .. كنت خايفة من برة جداً حاسة اني هموت بمجرد ما افتح الباب بضحك على نفسي وبقول هاخد على الحبسة هاخد على الضلمة هاخد على الوحدة ماعرفتش اعمل كده بس مش ندمانة .. لما طلعت مالقتش حاجة تخوف ولا الموت والالم كان مستنيني ولا حاجة .. المكان منور برة وجميل ، مليان انوار وامل البداية مبشرة انا عمري ما هحبس نفسي في اوضة ضلمة تاني هطلع برة في الخضرة والهوا ، انا بحب الخضرة وبحب النور وبحب الهوا بس في نفس الوقت الدنيا تكون دفا مابحبش البرد ..
أنا المندفعة × أنا الخايفة
وقعت اول ما مشيت بس شوية على الطريق وقعت رجليا اتكسروا واتحبست لوحدي مع النور والخضرا والهوا بس ماكنتش حاسة ب اي حاجة غير الالم في رجلي واحساسي بالعجز والحبسة تاني والخوف لا تفضل رجليا مكسرين .. هعمل ايه ساعتها؟ مين هينقذني؟ يا ريتني حتى كنت قادرة احس بشوية الهوا دول واتنفسهم وانا واقعة وبتألم كده ..
مقالات قد تهمك:
- اعراض الاكتئاب الشديد
- أفضل طرق تحسين مهارات التواصل بالعين ولغة العيون بشكل كبير لديك بالضغط هنا
- كيف تتعامل مع الشخص العصبي بالضغط هنا
أنا قوية رغم كل شئ
ظهرت انا المندفعة الحادة وقالتلي يلا قومي هتعرفي تقومي مفيش حل تاني او على الاقل هتفضلي تحاولي لأن برضه مفيش حل تاني وفضلت انا الخايفة المتوترة تعيط جنبي كانت خايفة عليا اموت هنا وانا رجليا مكسورة ولوحدي حاولت كتير تخبي خوفها بس كنت بشوفه دايماً كان كبير وعظيم ..
انا وانا فضلوا معايا كل ده وماتخلوش عني زي ما كنت عايزة اتخلى عنهم .. واكتشفت انهم طول الوقت كانوا الجنود اللي بيساعدوني عشان اعرف اعيش واتحرك واحاول واجرب واجتاز وانفس عن غضبي واخد حقي وأمن نفسي ..
انا الخايفة كانت حبساني جوا الاوضة كانت خايفة عليا لو طلعت برة يجرالي اللي جرالي وكانت طول الوقت بتجمع اي حاجة وبتعمل كل حاجة عشان تخليني اعيش في امان وانا المندفعة هي اللي كسرت الباب وخرجتني من الاوضة وهي اللي وقفتني على رجلي وخلتني احاول لأن مفيش اي حل بالنسبة لها غير المحاولة لولا اصرارها وتصرفها في الوقت المناسب كان زماني انتهيت في بحر الاكتئاب واليأس ..
اعتقد
جه الوقت اتصالح معاهم وافهمهم واقدرهم واقولهم شكراً انكم كنتوا جنبي وساعدتوني طول
الوقت .. جه الوقت ان انا اللي امسك الدفة بس عمري ما هستغنى عن حضوركم في حياتي.
خواطر رضوى حسني ،،،
ليصلك كل ما هو جديد ومفيد وصحي برجاء الإعجاب FaceBook بصفحتنا على الـ
